Blog

पर्सा कार्तिक १७ । जिल्ला प्रहरी कार्यालय पर्साले गत असोज ७ गतेदेखि कात्तिक ७ गतेसम्मको अवधिमा विभिन्न आपराधिक गतिविधि नियन्त्रणका साथै सामाजिक उत्तरदायित्वमा पनि प्रभावशाली उपलब्धि हासिल गरेको छ। प्रहरी उपरीक्षक एसपी सुदिपराज पाठकका अनुसार, अपराध नियन्त्रण, जनसचेतना तथा विपद् व्यवस्थापन सबै क्षेत्रमा पर्सा प्रहरीले सक्रियता देखाएको छ।

यस अवधिमा प्रहरीले लागूऔषध कारोबारमा संलग्न ७ जनालाई पक्राउ गरी करिब ३१ ग्राम २९ मिलीग्राम खैरो हिरोइन, ३१ किलो ९०० ग्राम गाँजा र ११ किलो चरेश बरामद गरेको छ। साथै, भन्सार छलि ल्याइएका लत्ता कपडा, खाद्यान्नलगायत करिब ६ करोड १७ लाख रुपैयाँ बराबरका सामान नियन्त्रणमा लिइएको प्रहरी कार्यालयले जनाएको छ। अपराध नियन्त्रणमा उल्लेखनीय सफलता हासिल गर्दै प्रहरीले फरार रहेका १७ जना प्रतिवादीलाई समेत पक्राउ गरी कानूनी प्रक्रिया अघि बढाएको छ।

मदिरा नियन्त्रण अभियान अन्तर्गत, बिरगंज क्षेत्रका विभिन्न स्थानबाट ४ हजार ६ सय ५० लिटर तयारी र ७ हजार ६ सय २० लिटर कच्चा मदिरा बरामद गरी १६ वटा अवैध भट्टी नष्ट गरिएको पर्सा प्रहरीको विवरणमा उल्लेख छ। त्यस्तै, अवैध रूपमा बालुवा लोड गरी ल्याइरहेका ३ वटा ट्र्याक्टर र वन अपराध अन्तर्गत १० क्युफिट सालको काठ नियन्त्रणमा लिइएको छ।सामुदायिक प्रहरी साझेदारी कार्यक्रम अन्तर्गत पर्सा प्रहरीले एक महिनामा ९८ वटा सचेतनामूलक कार्यक्रम सञ्चालन गरी करिब १ हजार ३ सय १० जनालाई प्रत्यक्ष लाभान्वित गरेको जनाएको छ।

हराएका १२ जना (२ महिला, १० बालिका) लाई फेला पारी अभिभावकको जिम्मा लगाइएको छ। साथै, १७ लाख रुपैयाँ बराबरका प्रतिबन्धित पटाका बरामद गरी नष्ट गरिएको पनि प्रहरीले जनाएको छ। विपद् व्यवस्थापनतर्फ पनि प्रहरी सक्रिय रहेको छ। उद्धार कार्यमा ७५० जना प्रहरी खटाइएका थिए। दुई दिनसम्मको अभियानमा ४०८ विपद् प्रभावित परिवारलाई खाद्यान्न र मौसमी सामग्री वितरण गरिएको बताइएको छ। एसपी सुदिपराज पाठकका अनुसार, “पर्सा प्रहरीले अपराध नियन्त्रणका साथै समुदायमा सचेतना फैलाउने र विपद् व्यवस्थापनमा पनि निरन्तर सक्रियता प्रदर्शन गरिरहेको छ।”

झापा कार्तिक १५ । गत कात्तिक ९ गतेदेखि बेपत्ता सरोज शर्माको शव शनिबार बिहान शिवसताक्षी नगरपालिका–१०, माईधारको विरिङ खोलाको पुलमुनि गाडिएको अवस्थामा फेला परेको छ। मृतक ३३ वर्षीय शर्मा आईटी पेशामा काठमाडौंमा बस्दै आएका थिए र दसैँ–तिहार मनाउन घर आएका थिए।

जिल्ला प्रहरी कार्यालय झापाका डीएसपी खगेन्द्रबहादुर खड्काका अनुसार शर्माको कार दुई दिनअघि मेचीनगर–१३ स्थित हातेमालो सामुदायिक वनभित्र जलेको अवस्थामा फेला परेको थियो। शव कार फेला परेको स्थानदेखि करिब २०–२२ किलोमिटर टाढा पुलमुनि भेटिएको थियो। प्रहरीको अनुसन्धानमा घटनामा संलग्न दुई जनालाई पक्राउ गरिएको छ। अनुसन्धानको क्रममा उनीहरूको बयानका आधारमा शव खोज्न पुलमा पुगेको प्रहरीले जनाएको छ। प्रहरीले हत्यामा संलग्न अन्य व्यक्तिहरूको खोजी पनि गरिरहेको छ।

शव फेला परेपछि आक्रोशित स्थानीयले माईधारमा पक्राउ परेकामध्ये एक व्यक्तिको घर तोडफोड गरेका छन्। त्यस्तै, मृतकको शव बोक्न प्रयोग भएको आशंकामा एउटा टेम्पो पनि स्थानीयले तोडफोड गरेका छन्। डीएसपी खड्काका अनुसार घटनाको प्रकृति हेर्दा हत्या चार दिनअघि भएको देखिन्छ। हत्यामा संलग्न केही व्यक्तिहरू लागुऔषध प्रयोगकर्ता रहेको दाबी गरिएको छ। प्रहरी अनुसन्धान जारी राख्दै छ र सबै तथ्य पत्ता लगाउने प्रयास भइरहेको छ।

भोजपुर कार्तिक १५ । भोजपुरको षडानन्द नगरपालिका–४ मा शनिबार भएको ट्याक्टर दुर्घटनामा दुई जनाको ज्यान गएको छ भने चार जना घाइते भएका छन्।

जिल्ला प्रहरी कार्यालय भोजपुरका अनुसार चाम्लादाङबाट दिङ्लातर्फ काठ बोकेर आउँदै गरेको प्रदेश १–०२–००३ त १२१३ नम्बरको ट्याक्टर अनियन्त्रित भई दुर्घटनाग्रस्त भएको हो। दुर्घटनामा षडानन्द नगरपालिका–४ केराबारीका २५ वर्षीय चालक आइतबहादुर तामाङ र अरुण गाउँपालिका–४ चरम्बिका १७ वर्षीय नवीन तामाङको घटनास्थलमै मृत्यु भएको प्रहरीले जनाएको छ।

त्यस दुर्घटनामा परी १९ वर्षीय दाछिरि शेर्पा, २३ वर्षीय अम्बर तामाङ, १८ वर्षीय सागर तामाङ र १८ वर्षीय सुनिता तामाङ घाइते भएका छन्। उनीहरूको दिङ्ला नगर अस्पतालमा उपचार भइरहेको जिल्ला प्रहरीले जनाएको छ। प्रहरीले दुर्घटनाको कारण अनुसन्धान भइरहेको जनाएको छ।

काठमाडौँ कार्तिक १४ । निवर्तमान प्रधानमन्त्री केपी शर्मा ओली र गृह मन्त्री रमेश लेखकको राहदानी रोक्का तथा स्थानहद सम्बन्धी रिटमा सर्वोच्च अदालतले अन्तरिम आदेश दिन अस्वीकार गरेको छ।

अधिवक्ता डा. प्रेमराज सिलवालले कात्तिक १२ गते दायर गरेको रिटमा दुई नेताको राहदानी रोक्का र स्थानहद आदेशको विरोध गर्दै अन्तरिम आदेश मागिएको थियो। तर सर्वोच्च अदालतका न्यायाधीश नृपध्वज निरौलाको इजलासले शुक्रबार उक्त माग अस्वीकार गर्दै ‘कारण देखाऊ आदेश’ जारी गर्ने निर्णय गरेको हो। अदालतले विपक्षी पक्षहरूलाई कारण देखाई जवाफ पेश गर्न आदेश दिँदै अन्तरिम आदेशको आवश्यकता नरहेको ठहर गरेको छ। यससँगै, ओली र लेखकको राहदानी रोक्का तथा स्थानहदसम्बन्धी विवादमा अब अदालतले विस्तृत सुनुवाइपछि मात्र अन्तिम निर्णय गर्ने भएको छ।