काठमाडौँ कार्तिक २२ । गृहमन्त्री ओमप्रसाद अर्यालले देशमा सुरक्षा, सुशासन र अर्थतन्त्रको जगेर्नाका लागि सरकार दृढ रहेको बताएका छन्।
नेपाल उद्योग वाणिज्य महासंघद्वारा आयोजित ‘आर्थिक बहस २.०’ कार्यक्रममा बोल्दै उनले शान्ति र सुरक्षाको सुनिश्चितताका लागि मन्त्रीहरूलाई रिझाउनुपर्ने आवश्यकता नभएको स्पष्ट पारे।
“अब सुरक्षा र सुशासन पनि सरकारले दिन्छ, मन्त्रीलाई रिझाउने काम गर्नु पर्दैन,” — गृहमन्त्री अर्याल
उनले गत भदौ २४ गतेको आन्दोलनका क्रममा घुसपैठ गरेर तोडफोड र आगजनी भएका घटनाको तथ्यांक प्रस्तुत गर्दै २११ वटा व्यापारिक तथा निजी भवन पूर्णरूपमा नष्ट र ४२७ भवन आंशिक क्षतिग्रस्त भएको बताए। गृहमन्त्रीका अनुसार घटनापछि ७१० वटा हराइएका हतियार फिर्ता भइसकेका छन्। त्यस्तै, १४ हजार ५४९ जना फरार कैदीबन्दीमध्ये ९ हजार ५२१ जना ९६५५० पक्राउ परेका छन् भने बाँकी ५ हजार १०५ जना अझै फरार रहेको उनले जानकारी दिए।
उनका अनुसार भदौ २४ का घटनामा संलग्न ३८० जनालाई पक्राउ गरी १५० जनाविरुद्ध आपराधिक उपद्रव, अभद्र व्यवहार, हतियार देखाई तर्साउने र जनआक्रोश उक्साउने लगायतका मुद्दा दायर गरिएको छ।
अर्यालले छोटो समयमा स्थिति सामान्यीकरण गर्न सरकार सफल भएको दाबी गर्दै भने, “अब छिटपुट घटना भए पनि तत्काल पत्ता लगाएर रोक्ने काम गरिन्छ। कानुनी राज्यको जगेर्ना सबैको साझा दायित्व हो।”
उनले सुशासनले नै सुरक्षा, आत्मसम्मान र गरिमा दिन सक्ने उल्लेख गर्दै राम्रो कामको मूल्यांकन र प्रोत्साहन गर्नुपर्नेमा जोड दिए।
“पछिल्लो पुस्ताको आन्दोलनको मूल कारण कुशासन थियो। यदि सुशासन दिन सकिएन भने द्वन्द्व दोहोरिन सक्छ, जसले राष्ट्रिय सुरक्षा संकट निम्त्याउन सक्छ,” — गृहमन्त्री अर्याल
अन्त्यमा उनले अर्थतन्त्र र कानुनी राज्य परिपूरक सम्बन्धमा रहेको बताउँदै नागरिक र निजी क्षेत्रले पनि त्यसको जिम्मेवारी लिनुपर्ने उल्लेख गरे।
“सरकारले उद्योग, व्यवसाय र बासस्थानको पूर्ण सुरक्षा दिनेछ। आर्थिक आधारशिला बलियो बनाउन र अर्थतन्त्रका कर्ताहरूलाई सुरक्षा दिनु राज्यको प्राथमिकता हो,” — गृहमन्त्री अर्याल
