पर्सा कार्तिक २२ । छिमेकी देश भारतको बिहार राज्यमा हुन गइरहेको विधानसभा निर्वाचनलाई ध्यानमा राख्दै पर्सा जिल्ला र भारतको पूर्वी चम्पारण जिल्लालाई जोड्ने सीमा नाकाहरूमा आवागमन बन्द गरिएको छ।

जिल्ला प्रशासन कार्यालय पर्साले जारी गरेको सूचनाअनुसार, कात्तिक २२ गतेदेखि २५ गते साँझ ६ बजेसम्म अत्यावश्यक बाहेक सबै प्रकारका आवतजावतमा रोक लगाइएको छ। सहायक प्रमुख जिल्ला अधिकारी सुमन कुमार कार्कीका अनुसार, नेपाल–भारत सीमावर्ती जिल्ला समन्वय बैठकमा असोज २९ गते भएको समझदारी अनुसार यो निर्णय लागू गरिएको हो।

निर्वाचन हुने कात्तिक २५ गतेसम्म सीमावर्ती सबै नाकामा आवागमन पूर्ण रूपमा बन्द रहने जिल्ला सुरक्षा समितिको निर्णय रहेको उनले जानकारी दिएका छन्। यस निर्णयले सीमा क्षेत्रमा सुरक्षा र निर्वाचन प्रक्रियाको सहजता सुनिश्चित गर्ने उद्देश्य राखेको छ।