Blog

जनकप्ुरधाम कार्तिक २३ । आठ वटा कम्युनिस्ट पार्टीहरूको एकीकरणपछि बनेको नेपाली कम्युनिस्ट पार्टी नेकपा अन्तर्गतको नयाँ युवा संगठन ‘नेपाली कम्युनिस्ट पार्टी–जेनजेड फ्रन्ट’ को घोषणा गरिएको छ।

जनकपुरमा आयोजित पत्रकार सम्मेलनमार्फत श्याम साहको संयोजकत्वमा जेनजेड फ्रन्टको औपचारिक घोषणा गर्दै संगठनले आफ्नो प्रस्तावना, उद्देश्य र संरचना सार्वजनिक गरेको हो। प्रस्तावनामा फ्रन्टले नयाँ पुस्ताको वैचारिक, संगठनात्मक र नेतृत्वगत प्रतिनिधित्व सुनिश्चित गर्ने र कम्युनिस्ट आन्दोलनलाई आधुनिक सोच र प्रविधिसँग जोड्ने लक्ष्य प्रस्तुत गरेको छ। साथै, समाजवाद, जनसत्ता र वर्गीय समानता स्थापनाका लागि वैज्ञानिक र व्यवहारिक दृष्टिकोण अपनाउने प्रतिबद्धता पनि उल्लेख गरिएको छ।

नीति दस्तावेजअनुसार, फ्रन्टले युवा पुस्तालाई राजनीतिक चेतना, अध्ययन, अनुशासन र नेतृत्वका क्षेत्रमा प्रशिक्षित गर्दै भावी वैचारिक अग्रणी बनाउन अभियान सञ्चालन गर्नेछ। कार्यक्रममा संयोजक साहले भने, “जेनजेड फ्रन्ट केवल युवा संगठन होइन, यो वैचारिक, राजनीतिक र सामाजिक चेतनाको नयाँ लहर हो। नयाँ पुस्ताको सोच र संघर्षलाई जोड्दै समाजवादी रूपान्तरणको नयाँ अध्याय सुरु भएको छ।”

संगठनले जनवादी क्रान्तिलाई समाजवादी रूपान्तरणमा लैजाने दीर्घकालीन रणनीति लिएको जनाएको छ। यसअन्तर्गत स्थानीयदेखि राष्ट्रिय तहसम्म युवा, विद्यार्थी र श्रमिक समुदायबीच वैचारिक अभियान सञ्चालन गर्ने तयारी गरिएको बताइएको छ।

काठमाडौँ कातिृक २३ । राष्ट्रपति रामचन्द्र पौडेल ले सुशासन र लोकतन्त्रलाई थप मजबुत बनाउन आउँदो फागुन २१ गते हुने प्रतिनिधिसभा निर्वाचन सफल पार्न सबै नागरिकलाई आह्वान गरेका छन्।

आइतबार सिंहदरबारमा आयोजित सार्वजनिक सेवा प्रसारण नेपालको पहिलो वार्षिकोत्सव तथा एनटीभी वर्ल्डको औपचारिक शुभारम्भ समारोहमा बोल्दै राष्ट्रपति पौडेलले लोकतन्त्रको जरा बलियो बनाउन सञ्चारमाध्यमको भूमिका निर्णायक हुने बताए।

“नेपाली जनताको ठूलो बलिदानीबाट स्थापित लोकतन्त्रको संरक्षण र सुदृढीकरणमा सञ्चारमाध्यमको योगदान अपरिहार्य छ,” राष्ट्रपति पौडेलले भने। उनले विशेषतः युवा पुस्ताको सुशासन र विकासप्रतिको आकांक्षालाई सम्बोधन गर्न आगामी निर्वाचनलाई सफल बनाउनुपर्नेमा जोड दिए। राष्ट्रपतिले सञ्चारमाध्यमलाई देशको सकारात्मक परिवर्तन, विकासका अवसर र सम्भावनाबारे जनतालाई सूचित गर्ने जिम्मेवारी दत्तचित्त भएर पूरा गर्न आग्रह गरे।

साथै, उनले सूचना प्रविधिको तीव्र विस्तारसँगै सामाजिक सञ्जाल र नागरिक पत्रकारिताको प्रभाव बढेको उल्लेख गर्दै, प्रविधिको दुरुपयोगले जनतालाई भ्रममा पार्ने जोखिम रोक्न जिम्मेवार सञ्चारमाध्यमको भूमिका अत्यावश्यक हुने बताए।

जनकपुरधाम कार्तिक २३ । उपेन्द्र यादव नेतृत्वको जनता समाजवादी पार्टी जसपा नेपाल का दुई जना नेताले पार्टी परित्याग गरेका छन्।

पार्टीभित्र हैकमवादी नेतृत्व र गुटगत राजनीति हाबी भएको आरोप लगाउँदै लुम्बिनी प्रदेशका अध्यक्ष सुमित्रा चौधरी र कार्यकारिणी सदस्य निरङ्कार यादव ले राजीनामा दिएका हुन्। उनीहरूले पार्टीमा विधि र विधानको अवहेलना हुँदै आएको र नेतृत्वले आन्तरिक लोकतन्त्रलाई कमजोर पारेको आरोप लगाएका छन्। चौधरी र यादव दुवैले साधारण सदस्यसमेत नरहने गरी पार्टी परित्याग गरेको घोषणा गरेका छन्।

पार्टीभित्र पछिल्ला दिनमा बढ्दो असन्तुष्टि र विभाजनका घटनाले जसपा नेपालको आन्तरिक एकता पुनः प्रश्नमा परेको देखिन्छ।

काठमाडौँ कार्तिक २३ । नेकपा एमालेका अध्यक्ष तथा पूर्वप्रधानमन्त्री केपी शर्मा ओली ले सरकारभित्र रहेका व्यक्तिहरूले जेनजी आन्दोलनको नाममा देश जलाउने काम गर्दै आएको आरोप लगाउनुभएको छ।

आइतबार काठमाडौंमा आयोजित राष्ट्रिय युवा संघ, नेपाल को केन्द्रीय कमिटी बैठकमा सम्बोधन गर्दै अध्यक्ष ओलीले भने, “सडकमा उफ्रिने आन्दोलनकारी मात्र होइनन्, जलाउनेहरूले नै देश चलाउने तमासा देखाइरहेका छन्।” उहाँले मुलुक अहिले असाधारण संकटमा रहेको भन्दै युवाहरूलाई देश र लोकतन्त्र जोगाउन अघि बढ्न प्रेरित गर्नुभयो।

ओलीले संविधान र लोकतन्त्रको रक्षा गर्न, प्रतिनिधि सभा पुनःस्थापनाको मागसहित आन्दोलनमा जाने निर्णय उहाँले लिएको स्पष्ट पार्नुभयो। उहाँको वक्तव्यले राजनीतिक अस्थिरता र आन्दोलनको नाममा भइरहेको गतिविधि सम्बन्धी गहिरो चिन्ता व्यक्त गर्दछ।