एजेन्सी कार्तिक २२ । आइतबार साँझ जापानको उत्तरी तटीय क्षेत्रमा ६.७ म्याग्निच्युडको शक्तिशाली भूकम्प गएको छ। जापान मौसम विज्ञान एजेन्सीका अनुसार भूकम्पपछि थप परकम्पहरू समेत महसुस गरिएको छ र तटीय क्षेत्रमा सुनामीको चेतावनी जारी गरिएको छ।

एजेन्सीका अनुसार जापानको स्थानीय समयअनुसार साँझ करिब ५ बजे इवाते प्रान्तको तटबाट करिब १० किलोमिटर समुद्र सतहमुनि केन्द्रविन्दु रहेको भूकम्प गएको थियो। सम्भावित रूपमा १ मिटर (लगभग ३ फिट) उचाइसम्मको सुनामी आउन सक्ने भन्दै अधिकारीहरूले सतर्कता अपनाउन आग्रह गरेका छन्। हालसम्म कुनै ठूलो क्षति वा मानवीय हानीको रिपोर्ट प्राप्त भएको छैन। प्रभावित क्षेत्रका दुई आणविक ऊर्जा केन्द्रहरूमा पनि कुनै असामान्य अवस्था देखिएको छैन। सुनामीको चेतावनी जारी गरिएको एक घण्टासम्म स्थिति निगरानीमा राखिएको जनाइएको छ।

जापानको राष्ट्रिय प्रसारक एनएचके का अनुसार इवाते प्रान्तका ओफुनाटो, मियाको, कामाईशी र ओमिनाटो बन्दरगाहमा १० देखि २० सेन्टिमिटर उचाइका लहरहरू मापन भएका छन्। विशेषज्ञहरूले भूकम्पपछि थप लहरहरू आउने सम्भावना रहेको र तटीय क्षेत्रमा केही घण्टासम्म सतर्क रहन आग्रह गरेका छन्। भूकम्पपछि उक्त क्षेत्रमा बुलेट रेल सेवा अस्थायी रूपमा रोकिएको छ भने केही स्थानमा विद्युत् आपूर्ति पनि अवरुद्ध भएको जापानी समाचार संस्था क्योडो न्यूज ले जनाएको छ।

प्रशान्त महासागरको ‘रिङ अफ फायर’ क्षेत्रमा अवस्थित जापान विश्वका सबैभन्दा भूकम्प जोखिमयुक्त देशहरू मध्ये एक हो। सन् २०११ मा यही क्षेत्रमा आएको शक्तिशाली भूकम्प र सुनामीका कारण ठूलो जनधनको क्षति भएको थियो।