एजेन्सी कार्तिक २३ । गाजाका स्वास्थ्य अधिकारीहरूले इजरायल–हमास युद्ध सुरु भएयता ६९ हजारभन्दा बढी प्यालेस्टिनी नागरिकको मृत्यु भएको जानकारी दिएका छन्।

यो तथ्यांक शनिबार युद्धविरामको प्रारम्भिक चरण अन्तर्गत जारी गरिएको हो, जसमा इजरायल र हमासबीच शव आदानप्रदान गरिएको थियो। यस क्रममा इजरायली आक्रमणमा मारिएका प्यालेस्टिनीहरूको शवसँगै, हमासद्वारा बन्धक बनाइएका इजरायलीहरूको शव पनि फिर्ता गरिएको छ।

इजरायलले शनिबार थप १५ प्यालेस्टिनी शवहरू फिर्ता गरेको जनाएको छ। त्यस्तै, हमासले एक दिनअघि एक इजरायली बन्धकको शव इजरायललाई हस्तान्तरण गरेको हो। इजरायली प्रधानमन्त्रीको कार्यालयले विज्ञप्ति जारी गर्दै फिर्ता गरिएको शव लियोर रुडेफ को रहेको पुष्टि गरेको छ। यो शव आदानप्रदान प्रक्रिया युद्धविराम सम्झौताको महत्वपूर्ण अंश हो। सम्झौताअनुसार, हमासले सबै बन्धकहरूको शव सकेसम्म चाँडो फिर्ता गर्नुपर्नेछ। तर, हमाससँग हाल पनि कम्तीमा पाँच इजरायली बन्धकका शवहरू रहेको इजरायली अधिकारीहरूले बताएका छन्।