काठमाडौँ कार्तिक २३ । जेनजी आन्दोलनमा संलग्न भएर दुई प्रहरीको हत्या गरेको आरोपमा भोजपुरको दोभानेका इन्द्रबहादुर राई पक्राउ परेका छन्। जिल्ला प्रहरी परिसर काठमाडौंका अनुसार राईलाई काठमाडौंको पवित्रनगरबाट पक्राउ गरिएको हो।

एसएसपी रमेश थापा का अनुसार राईले भदौ २३ र २४ मा भएको आन्दोलनको क्रममा प्रहरी वृत्त महाराजगञ्जका दुई प्रहरीको हत्या गरेको आरोप छ। पक्राउ परेका राई प्रहरी हत्या गर्दा लगाएको पहिचानयोग्य पोशाकमा नै फेला परेका छन्। भिडियो रेकर्ड अनुसार उनी कालो टी–सर्ट अगाडि हल्का रातो धर्सा सहित, हाफ पाइन्ट र सेतो जुत्ता लगाएर अपराध स्थलमा उपस्थित थिए।

प्रहरीका अनुसार राई सहितका व्यक्तिहरूले वृत्त परिसरमा रहेको मन्दिर अगाडि प्रहरीलाई कुटपिट गरेका थिए। यस अघि पनि प्रहरीले प्रहरी हत्यामा संलग्न एक दर्जनभन्दा बढी व्यक्ति पक्राउ गरिसकेको छ भने केहीलाई पुर्पक्षका लागि कारागार चलान गरिएको छ। अनुसन्धान अझै जारी रहेको प्रहरीले जनाएको छ।