भारत भदौ ४ । चीन र भारतले नेपाली भूमिसम्म पुग्ने लिपुलेक पास हुँदै द्विपक्षीय सीमा व्यापार पुनः सञ्चालन गर्ने सहमति गरेका छन्। चिनियाँ विदेशमन्त्री वाङ यीको भारत भ्रमणको क्रममा मंगलबार नयाँ दिल्लीमा भारतीय विदेशमन्त्री एस जयशंकरसँग भएको वार्तापछि यो सहमति भएको भारतीय विदेश मन्त्रालयले जनाएको छ।

विदेश मन्त्रालयको विज्ञप्तिमा भनिएको छ कि दुवै पक्षले लिपुलेक पास, शिपकी ला पास र नाथू ला पास गरी तीनवटा तोकिएका व्यापारिक मार्गहरूबाट सीमा व्यापार पुनः खोल्ने निर्णय गरेका छन्।

यो सहमति सन् २०१५ मा भारतीय प्रधानमन्त्री नरेन्द्र मोदीको चीन भ्रमणका बेला पनि भएको थियो, तर त्यो बेला जानकारी नदिइ नेपाली भूमिमा व्यापार गर्ने विषयमा नेपालले विरोध प्रकट गरेको थियो। लिपुलेक क्षेत्र नेपालले आफ्नो पश्चिमी सीमा लिम्पियाधुरा नजिकै पर्ने दाबी गर्दै आएको छ। यस विषयमा नेपालमा अझै संवेदनशीलता कायम छ, किनभने यो भूभाग नेपालको आधिकारिक क्षेत्राधिकारमा पर्छ।