रौतहट भदौ ३ । विजयपुर नगरपालिका विवादमा फेरि एक पटक जनप्रतिनिधि परिवारसँग सम्बन्धित घटना सार्वजनिक भएको छ। उपमेयर अम्बेया खातुनका छोरा मोहम्मद सनाउल्लाहमाथि पत्रकार कृष्ण तिवारीप्रति दुर्व्यवहार गरेको आरोपमा जिल्ला अदालत रौतहटले पक्राउ पुर्जी जारी गरेको छ।

इलाका प्रहरी कार्यालय विजयपुरका प्रमुख इन्स्पेक्टर सुरेन्द्र यादवका अनुसार, पत्रकार तिवारीमाथि साउन ३० गते नगरसभा कार्यक्रममा सहभागी हुन जाँदै गर्दा सन्तपुर चौक नजिकै सनाउल्लाहले दुर्व्यवहार गरेका थिए। पीडित पत्रकारले जाहेरी दिएको र त्यसपछि रौतहट प्रहरी प्रमुख एसपी नेत्र मणि गिरीको निर्देशनमा अनुसन्धान भइरहेको छ। प्रहरीले सनाउल्लाहलाई पक्राउ गर्नका लागि विशेष टोली परिचालन गरेको जानकारी पनि सार्वजनिक भएको छ। घटनाप्रति प्रेस चौतारी नेपाल रौतहट शाखाले कडा आपत्ति जनाउँदै पत्रकारमाथि आक्रमण र धम्की लोकतन्त्र र प्रेस स्वतन्त्रताको लागि ठूलो खतरा भएको बताएको छ।

यसअघि, महालेखा परीक्षकको प्रतिवेदनले विजयपुर नगरपालिकामा इन्धन र यातायात खर्चमा व्यापक अनियमितता देखाएको थियो। उक्त प्रतिवेदन सार्वजनिक भएपछि पत्रकार तिवारीले अनियमितता उजागर गर्दै समाचार लेखेका थिए। तर त्यसपछि अम्बेया खातुनका छोराले पत्रकारमाथि दुर्व्यवहार गरेको आरोप लाग्दै आएको छ। स्थानीय निर्वाचनपछि उपमेयर बनेकी अम्बेया खातुनको परिवारको हस्तक्षेपका कारण नगरपालिकाको कामकाज अस्तव्यस्त भएको भन्दै जनप्रतिनिधिहरूले पनि गुनासो व्यक्त गरेका छन्। पत्रकारमाथि दबाब र आक्रमण गर्ने प्रवृत्ति बढ्दै गएमा प्रेस स्वतन्त्रता र लोकतान्त्रिक व्यवस्था संकटमा पर्ने विज्ञप्तिमा चेतावनी दिइएको छ।