काठमाडौं साउन १८ । प्रधानमन्त्री केपी शर्मा ओली आज तुर्कमेनिस्तानको अवाजा सहरमा आयोजित भूपरिवेष्टित विकासशील राष्ट्रहरूको तेस्रो संयुक्त राष्ट्रसङ्घीय सम्मेलनमा भाग लिन नेपाली प्रतिनिधिमण्डलको नेतृत्व गर्दै प्रस्थान गर्दै छन्।

यस सम्मेलनले साउन २० देखि २३ गतेसम्म आयोजना हुने जनाइएको छ। तुर्कमेनिस्तानका राष्ट्रपति सेरदार बेरदिमुहामेदोभ र संयुक्त राष्ट्रसङ्घका महासचिव एन्टोनियो गुटेरेसको औपचारिक निमन्त्रणामा प्रधानमन्त्री ओली भ्रमणमा जान लागेका हुन्। सम्मेलनमा प्रधानमन्त्री ओलीले कम विकसित राष्ट्रहरूको विश्वव्यापी समन्वय ब्युरोको अध्यक्षको हैसियतले सम्बोधन गर्नेछन्। साथै, सम्मेलनको उच्चस्तरीय गोलमेच बैठकको सह–अध्यक्षता र अन्य विविध कार्यक्रमहरूमा पनि उनले मन्तव्य प्रस्तुत गर्नेछन्।

भ्रमणको क्रममा प्रधानमन्त्री ओलीले विभिन्न देशका प्रतिनिधि र अन्तर्राष्ट्रिय संस्थाका उच्चपदस्थसँग भेटवार्ता गर्ने कार्यक्रम रहेको छ। उनको टोलीमा श्रीमती राधिका शाक्य, प्रमुख सल्लाहकार विष्णुप्रसाद रिमाल, सङ्घीय संसद्का सदस्य सूर्यबहादुर थापा क्षेत्री र अन्य उच्चपदस्थ अधिकारीहरू पनि सहभागी छन्। प्रधानमन्त्री ओली साउन २३ गते स्वदेश फर्किने कार्यक्रम रहेको छ।