काठमाडौँ भदौ २५ । मुलुकको प्रमुख प्रशासनिक केन्द्र सिंहदरबार पछिल्लो १८ घन्टायता निरन्तर रूपमा जलेको छ। नेपाली सेनाको अग्निनियन्त्रण टोली फायर ब्रिगेड लगातार आगो निभाउन खटिएको छ, तर ४० पटक दमकल प्रयोग गर्दा पनि आगो नियन्त्रणमा आउन सकेको छैन। दमकल बेलुकैदेखि खटिएको छ, ४० पटक पानी बोकेर आगोमा हालिसक्यौं, फायर ब्रिगेडमा खटिएका एक सैनिकले जानकारी दिए। तर आगो सिंहदरबारभरि फैलिएको हुँदा नियन्त्रण प्रयास सफल हुन सकेको छैन।
गृह र ऊर्जा मन्त्रालय पूर्ण रूपमा नष्ट
मंगलबार दिउँसो सुरु भएको आगलागीबाट सिंहदरबार अहिले खण्डहरमा परिणत भएको छ। गृह मन्त्रालय र ऊर्जा मन्त्रालय जलेर पूर्ण रूपमा नष्ट भइसकेका छन्। त्यसैगरी अर्थ मन्त्रालय, शिक्षा मन्त्रालय, र राष्ट्रिय सतर्कता केन्द्र समेत आगोको चपेटामा परेका छन्।
धुँवाको मुस्लो अझै छुटिरहेछ
हाल सिंहदरबारको पश्चिमी मोहडाबाट बाक्लो धुँवाको मुस्लो छुटिरहेको छ। मूल भवनतर्फ पनि आगलागी नरोकिएको दृश्य देखिएको छ। भित्र रहेका २० मन्त्रालयमध्ये केही थोरै मात्रै प्रयोगयोग्य अवस्थामा छन्।
सर्वोच्च अदालतमा पनि आगलागी
सिंहदरबार नजिकैको रामशाहपथस्थित सर्वोच्च अदालत परिसरमा समेत आगलागी भएको छ। अदालत भवनबाट पनि धुँवाको मुस्लो छुट्ने क्रम जारी छ।
निष्कर्ष; देशको प्रशासनिक संरचना संकटमा
देशको प्रशासनिक शक्ति केन्द्रमै आगलागी हुँदा समग्र राज्य संयन्त्रको सञ्चालनमा गम्भीर असर पर्ने अवस्था देखिएको छ। सिंहदरबारको पुनःनिर्माण तथा क्षतिका विवरणहरू अझै संकलन हुँदैछ।
प्रतिक्रिया
सम्बन्धित खवर
