काठमाडौँ भदौ १२ । विद्यालय शिक्षा विधेयकप्रति असन्तुष्टि जनाउँदै आन्दोलनरत नेपाल शिक्षक महासंघले सत्तारूढ नेकपा एमाले को केन्द्रीय कार्यालय, च्यासलमा धर्ना दिएको छ।

भदौ ९ गतेदेखि आन्दोलनमा उत्रिएको महासंघ ले संसदमा पेश भइसकेको शिक्षा विधेयकलाई शिक्षकविरोधी भन्दै विभिन्न राजनीतिक दलको ध्यानाकर्षण गराउने अभियान सञ्चालन गरिरहेको छ। यसै सिलसिलामा बिहीबार एमाले कार्यालयमा धर्ना दिइएको हो। सो अवसरमा महासंघका अध्यक्ष लक्ष्मीकिशोर सुवेदीले ध्यानाकर्षण पत्र नेकपा एमाले महासचिव शंकर पोखरेललाई बुझाएका थिए। यसअघि बुधबार नेपाली कांग्रेसको सानेपास्थित पार्टी कार्यालयमा धर्ना दिइएको थियो भने शुक्रबार नेकपा माओवादी केन्द्र को पेरिसडाँडा कार्यालयमा प्रदर्शन गर्ने कार्यक्रम तय गरिएको छ।

विधेयक संसदको प्रक्रियामा

विवादित विद्यालय शिक्षा विधेयक हाल प्रतिनिधि सभामा पेश भइसकेको छ। संसदको सम्बन्धित समितिबाट पारित भई प्रतिनिधि सभाबाट पारित भएपछि विधेयक राष्ट्रिय सभामा जानेछ। अन्ततः राष्ट्रपति समक्ष प्रमाणीकरणका लागि पेश गरिने र त्यसपछि विधेयक ऐनका रूपमा लागू हुनेछ। शिक्षक महासंघले विधेयकमा समावेश प्रावधानहरूले शिक्षकको अधिकार कटौती गर्ने, स्थायीत्वलाई असर पुर्‍याउने र निजीकरणको ढोका खोल्ने भन्दै आपत्ति जनाएको छ।