काठमाडौँ भदौ ४ । जनता समाजवादी पार्टी नेपाल का अध्यक्ष उपेन्द्र यादवविरुद्ध गौर घटनासम्बन्धी मुद्दामा सर्वोच्च अदालतको पूर्ण आदेश सार्वजनिक नहुँदै अतिरञ्जित रूपमा समाचार प्रचार भएकोमा पार्टीले आपत्ति जनाएको छ।

पार्टीका प्रवक्ता मनीषकुमार सुमनले बुधबार जारी गरेको विज्ञप्तिमा अदालतको आदेशप्रति पार्टी र अध्यक्ष उपेन्द्र यादव पूर्ण सहयोग गर्न तयार रहेको जानकारी दिइएको छ। सुमनले भनेका छन्, “अदालतको आधिकारिक आदेश सार्वजनिक हुनु अघिनै सञ्चारमाध्यमहरूले मधेस आन्दोलन कमजोर बनाउन र अध्यक्षलाई राजनीतिक प्रतिशोधको भाग बनाउन पूर्वाग्रही समाचारहरू चलाएको आरोप छ।”

२०७६ भदौ २० मा सर्वोच्च अदालतले गौर घटनासम्बन्धी मुद्दामा सुरक्षा निकायलाई छानबिन अघि बढाउन आदेश दिएको थियो। जसपा नेपालको अनुसार, अदालतको आधिकारिक आदेश नआउँदै विवादास्पद समाचार प्रचार हुनु पूर्ण रूपमा पूर्वाग्रही र दुष्प्रचारपूर्ण रहेको छ। २०६३ साल चैत्र ७ गते रौतहटमा भएको उक्त घटनामा तत्कालीन सरकारले उच्चस्तरीय न्यायिक समिति गठन गरी सत्य तथ्यहरू संकलन गरिसकेको छ। साथै, राष्ट्रिय मानव अधिकार आयोग र संयुक्त राष्ट्र संघीय मिशन युएनएमआईएन ले पनि स्वतन्त्र अनुसन्धान गरी तथ्यपरक प्रतिवेदन सार्वजनिक गरिसकेका छन्।

जसपा नेपालले राजनीतिक विषयहरू राजनीतिकै माध्यमबाट समाधान खोजिनुपर्ने बताउँदै अदालतको आदेशको विषयमा कुनै प्रकारको विवाद वा आन्दोलन नगर्न आफ्ना नेता तथा कार्यकर्तालाई आग्रह गरेको छ।