काठमाडौं,
जनता समाजवादी पार्टी (जसपा) नेपालले संघीय सरकारलाई दिएको समर्थन फिर्ता लिएको छ। बुधबार बसेको पार्टीको संसदीय दलको बैठकले समर्थन फिर्ता लिने निर्णय गरेको हो।
पार्टीका प्रचार प्रसार तथा प्रकाशन विभाग प्रमुख पूर्ण बस्नेतका अनुसार केही समयअघि नै पार्टीको कार्यकारिणी समितिबाट सरकारलाई दिएको समर्थन फिर्ता लिने सैद्धान्तिक निर्णय भइसकेको थियो। तर त्यसपछि प्रधानमन्त्री एवं नेकपा एमाले अध्यक्ष केपी शर्मा ओली तथा नेपाली कांग्रेस सभापति शेरबहादुर देउवासहित शीर्ष नेताहरूसँग जसपाका नेताहरूबीच छलफल भएका थिए।
छलफलमा भूमि विधेयकका विभिन्न प्रावधान, सत्ता सहकार्य र समसामयिक राजनीतिक विषयहरूमा बहस भएको थियो। तर जसपाले भूमि सम्बन्धी विधेयकका विवादास्पद प्रावधानहरूमा आफ्नो अडान परिवर्तन गर्न अस्वीकार गरेपछि समर्थन फिर्ता लिने निर्णयलाई औपचारिक बनाइएको हो।
जसपा नेपालले लामो समयदेखि भूमि विधेयकका केही प्रावधानले साना किसान, दलित र सीमान्तकृत समुदायहरूका हक अधिकारमाथि आँच पुग्ने भन्दै आपत्ति जनाउँदै आएको थियो। पार्टीले संसदमा समेत विधेयकको विरोध गर्दै संशोधनको माग गर्दै आएको थियो।
ओली र देउवाले पार्टी नेताहरूसँगको भेटमा संवादमार्फत समस्याको समाधान खोज्न सकिने संकेत दिएका थिए। तर ती छलफलहरूबाट स्पष्ट सहमति नजुटेपछि जसपा नेपालले सरकारलाई दिएको समर्थन औपचारिक रूपमा फिर्ता लिएको हो।
यस निर्णयसँगै संघीय संसद्मा सरकारको बहुमतको अवस्था थप जटिल बन्ने देखिएको छ। जसपाको समर्थन फिर्ताले सत्तासमीकरणमा नयाँ बहस सुरु हुने देखिन्छ। आगामी दिनमा सरकारको संरचना, गठबन्धन र रणनीतिमा पुनः समायोजनको आवश्यकता पर्न सक्ने राजनीतिक विश्लेषकहरूको भनाइ छ।
प्रतिक्रिया
सम्बन्धित खवर
