प्रचण्डद्वारा दिएको चेतावनी: क्रान्ति नजिकै छ

काठमाडौँ कार्तिक १५ । नेकपा माओवादी केन्द्र महाधिवेशन आयोजक समिति संयोजक पुष्पकमल दाहाल ‘प्रचण्ड’ले राष्ट्र गम्भीर संकटमा रहेको भन्दै हालको समय “साम्राज्यवाद र समाजवादी क्रान्तिबीचको टक्करको चरण” भएको बताएका छन्।

पार्टी केन्द्रीय कार्यालय पेरिसडाँडामा आयोजित कार्यक्रममा प्रचण्डले शान्ति प्रक्रियाका बाँकी काम अझै अधुरो रहेको उल्लेख गर्दै, सरकारमा रहँदा र बाहिर रहँदा निरन्तर राज्यलाई सचेत गराउँदै आएको बताए।

उनले भने, “२३ र २४ का घटनाक्रमले देखायो, क्रान्ति अब टाढा छैन, बरु नजिक आएको छ। जनताको असन्तुष्टि र आक्रोशलाई सही ढंगले संगठित गर्न सके समाजवादी क्रान्ति छोटो समयमै सम्भव छ।”

हरेक नेतृत्वले आश्वासन दिने भए पनि ढिला परिणामका कारण सहिद परिवारमा आक्रोश हुनु स्वाभाविक भएको उनले बताए। “हाम्रो निरन्तर प्रयासमा सहिद घोषणा, विधेयक निर्माण र आयोग गठन भए पनि ती आयोगहरूले अपेक्षित परिणाम दिन सकेका छैनन्,” उनले जोड दिए।