जनकपुरधाम कार्तिक १३ । महोत्तरीको औरही नगरपालिका–४ कटुधारमा मोटरसाइकलको ठक्करबाट एक बालिकाको मृत्यु भएपछि स्थानीयवासीले सडक अवरुद्ध गरेका छन्।

बुधबार अपरान्ह साइकलमा विद्यालयतर्फ जाँदै गरेकी १० वर्षीया शिवानी यादवलाई नम्बर नखुलेको मोटरसाइकलले ठक्कर दिएको थियो। ठक्कर दिँदा उनी गम्भीर घाइते भएकी थिइन्। गम्भीर अवस्थामा रहेका शिवानीलाई उपचारका लागि महोत्तरीको जानकी एकेडेमिक हस्पिटलमा लगिएको थियो, तर राति नै उनको मृत्यु भएको महोत्तरीका प्रहरी प्रवक्ता डिएसपी शैलेन्द्र भट्टले जानकारी दिए। डिएसपी भट्टका अनुसार, कालो ज्याकेट लगाएको व्यक्ति सवार मोटरसाइकलले ठक्कर दिएर घटनास्थलबाट फरार भएको छ। हाल ठक्कर दिने मोटरसाइकल र चालकको खोजी कार्य जारी रहेको प्रहरीले जनाएको छ।

घटनापछि आक्रोशित स्थानीयवासीले बिहीबार बिहान ११ बजेदेखि कटुधार क्षेत्रमा हुलाकी राजमार्ग अवरुद्ध गर्दै दोषीलाई तत्काल पक्राउ गरी कारबाही गर्न माग गरेका छन्। यसबीच, इलाका प्रहरी कार्यालय गौशालामा मृतक परिवार र प्रहरीबीच वार्ता भएको छ। दुई दिनभित्र दोषी पत्ता लगाई कारबाही अघि बढाउने सहमतिसँगै स्थानीयले सडक खुलाउने तयारी गरेको बताएका छन्।