काठमाडौँ कार्तिक १३ । जेनजी आन्दोलनका क्रममा देशभर तोडफोड, आगजनी र लुटपाटमा संलग्न भएको आरोपमा २५१ जनालाई पक्राउ गरिएको नेपाल प्रहरीले जनाएको छ।

नेपाल प्रहरीका केन्द्रीय प्रवक्ता तथा डीआईजी विनोद घिमिरेका अनुसार, ११ कात्तिकसम्मको विवरणअनुसार विभिन्न जिल्लाबाट २५१ जना नियन्त्रणमा लिइएका हुन्। तीमध्ये काठमाडौंबाट ९९ जना, ललितपुरबाट २६ जना र भक्तपुरबाट २१ जना पक्राउ परेका छन्। बाँकी पक्राउ अन्य जिल्लाबाट गरिएको प्रहरीले जनाएको छ।

प्रवक्ता घिमिरेका अनुसार, पक्राउ परेकामाथि कर्तव्य ज्यान, आपराधिक उपद्रव, हातहतियार खरखजना, चोरी र अभद्र व्यवहार सम्बन्धी मुद्दा दर्ता गरिएको छ। उनले भने, “तोडफोड, आगजनी र लुटपाटमा संलग्न सबैलाई प्रमाणसहित कानुनी दायरामा ल्याइनेछ।”

प्रहरीका अनुसार, जेनजी आन्दोलनका क्रममा भएको आगजनी, लुटपाट र तोडफोडका दृश्य देखिने करिब ३६ हजार भिडियो र तस्वीर प्रहरी मेलमा आएका छन्। ती सामग्रीको विश्लेषण गरी व्यक्ति पहिचान गरी थप कारबाही अघि बढाइने जनाएको छ। गत २३ र २४ भदौमा भएको जेनजी आन्दोलनमा ७६ जनाको मृत्यु भएको थियो। त्यस क्रममा सिंहदरबारलगायतका महत्वपूर्ण सरकारी संरचनामा आगजनी गरिएको थियो।