सर्लाही कार्तिक २२ । सर्लाहीको लालबन्दी नगरपालिका–१५ स्थित माथिल्लो देउराली सामुदायिक वनभित्र एक पुरुष मृत अवस्थामा फेला परेका छन्।

शनिबार बिहान उक्त जंगलमा लालबन्दी–१६ बस्ने ५५ वर्षीय भरत बस्नेतको शव फेला परेको प्रहरीले जनाएको छ।स्थानीयवासीहरूले जंगलमा शव देखेपछि प्रहरीलाई खबर गरेका थिए। त्यसपछि प्रहरीको टोली घटनास्थलमा पुगेर मुचुल्का उठाउने कार्य गरेको हो। मृतक बस्नेतको मृत्युको कारण स्पष्ट नभएको र घटना सम्बन्धमा आवश्यक अनुसन्धान भइरहेको जिल्ला प्रहरी कार्यालय सर्लाहीले जनाएको छ।

प्रारम्भिक जानकारीअनुसार बस्नेत शुक्रबार बिहान घरबाट निस्किएका थिए। तर साँझसम्म घर नफर्केपछि परिवारले खोजी गरिरहेका बेला शनिबार बिहान जंगलमा उनको शव फेला परेको थियो। प्रहरीले शवलाई पोष्टमार्टमका लागि अस्पताल पठाएको छ र घटनाको विस्तृत अनुसन्धान अघि बढाइएको जनाएको छ।