काठमाडौँ कार्तिक १९ । नेपाली कम्युनिष्ट पार्टीका सहसंयोजक माधवकुमार नेपालले पार्टीलाई अझ एकीकृत र बलियो बनाएर अघि बढाउने प्रतिबद्धता जनाएका छन्।

एकता राष्ट्रिय सम्मेलनलाई सम्बोधन गर्दै उनले विचार र सिद्धान्त मिल्ने दल तथा नेतासँग निरन्तर एकताको पहल गर्ने बताउँदै, गणतन्त्र र संघीयताको रक्षा गर्न मोर्चाबन्दीमार्फत पनि अघि बढ्ने स्पष्ट संकेत दिए।

“संविधानको रक्षा गर्न चाहनेहरूबीच अझै पनि एकता आवश्यक छ,” उनले भने, “गणतन्त्रका पक्षधरहरूबीच हातेमालो गर्दै अघि बढ्नका लागि पहल गरिनेछ।” उनले विचार, सिद्धान्त, कार्यदिशा, रणनीति र कार्यनीति मिल्नेहरूसँग एकता गर्दै देशभक्त शक्तिसँग मोर्चा निर्माण गर्ने बताए। नेपालले कसैप्रति पूर्वाग्रह नराखी सकारात्मक सोचका साथ एकता अभियान अघि बढाइने उल्लेख गर्दै विदेशी दलाल र गणतन्त्रका विरोधीहरूलाई पार्टीमा स्थान नदिइने पनि स्पष्ट गरे।