‘अब प्रचण्ड–माधव देशका नेता बन्ने बेला’– महिन्द्र राय यादव

काठमाडौँ कार्तिक १९ । नवघोषित नेपाली कम्युनिस्ट पार्टीका नेता महिन्द्र राय यादवले मुलुक कठिन मोडमा रहेका बेला नेता पुष्पकमल दाहाल ‘प्रचण्ड’ र माधवकुमार नेपालले देशलाई निकास दिन महत्त्वपूर्ण भूमिका खेलेको बताएका छन्।

बुधबार आयोजित एकता घोषणा कार्यक्रममा बोल्दै यादवले जेनजी आन्दोलनपछि कांग्रेस र एमाले निष्क्रिय बनेको अवस्थामा प्रचण्ड र नेपालले अग्रसरता लिएर राजनीतिक दिशा देखाएको उल्लेख गरे। उनले दुई नेतालाई पार्टीको सीमाभन्दा माथि उठेर राष्ट्रिय नेतृत्वको भूमिका लिनुपर्ने समय आएको बताए। “अब उहाँहरूसामु ठूलो जिम्मेवारी छ, पार्टीका मात्र होइन, देशका नेता बन्ने बेला आएको छ,” यादवले भने।

यादवले कम्युनिस्ट पार्टीहरूको विगतको टुटफुट अन्त्य हुने विश्वास व्यक्त गर्दै भने, “१० भाइ एक ठाउँमा आएका छन्, अब आन्तरिक लोकतन्त्रको अभावकै कारण दोहोरिएको विभाजनको शृंखला समाप्त हुनेछ।” उनले माओवाद छाडेर मार्क्सवाद र लेनिनवादको बाटो समातेकोमा पार्टी नेतृत्वलाई धन्यवाद दिँदै भने, “तर मार्क्सवादले भनेझैं नेतृत्वले पनि समयअनुसार आफूलाई बदल्नुपर्नेछ।”