काठमाडौँ कार्तिक १३ । देशभर वर्षासँगै मौसम सक्रिय बन्दै गएको छ । लगातारको वर्षाले धेरै स्थानमा सडक र यातायातमा असर पारे पनि मुग्लिन–नारायणगढ सडक खण्डमा हालसम्म कुनै पनि अवरोध नभएको सडक डिभिजन भरतपुरले जनाएको छ ।

सडक डिभिजनका सुपरभाइजर ईश्वर क्षेत्रीका अनुसार भारी वर्षा भए पनि सडक सञ्चालनमा रहेको र सवारीसाधनको आवागमन सामान्य रूपमा भइरहेको छ । उनले भने, “हालसम्म कुनै पहिरो वा बाटो अवरुद्ध हुने घटना भएको छैन, सडक सुचारु अवस्थामा छ ।”

तर वर्षातको समयमा उक्त क्षेत्र पहिरोको उच्च जोखिमयुक्त भएकाले यात्रु र चालकहरूलाई सतर्क रहन आग्रह गरिएको छ । सडक डिभिजनले यात्रुहरूलाई यात्रा अघि सडकको अवस्था बुझ्ने, ट्राफिक नियम पालना गर्ने र लेन अनुशासनमा रही सुरक्षित रूपमा यात्रा गर्न अनुरोध गरेको छ । सडक डिभिजनले थप जनाएको छ, “निरन्तर वर्षा भइरहेकाले आकस्मिक घटनाको सम्भावना रहन्छ, त्यसैले सावधानी अपनाउन अत्यावश्यक छ ।”