एजेन्सी कार्तिक १३ । केन्याको तटीय काउन्टी क्वालेमा मंगलबार भएको विमान दुर्घटनामा १२ जनाको मृत्यु भएको छ। केन्या नागरिक उड्डयन प्राधिकरण का अनुसार, दुर्घटनाग्रस्त विमान ५–वाई–सीसीए दियानीबाट मासाई मारा नेसनल रिजर्भको किचवा टेम्बोतर्फ उडान भरिरहेको थियो।

केसीएएका प्रवक्ताले विज्ञप्ति जारी गर्दै विमानमा रहेका सबै १२ जना यात्रु र चालकदलको मृत्यु भएको पुष्टि गरेका छन्। दुर्घटनाको कारण अझै स्पष्ट नभए पनि अनुसन्धान टोली घटनास्थलमा पुगेको र प्रारम्भिक अध्ययन सुरु भइसकेको बताइएको छ। स्थानीय अधिकारीहरूले विमानमा सवार अधिकांश पर्यटक यात्रुहरू रहेको जनाएका छन्। उक्त विमान मोम्बासा र अन्य लोकप्रिय पर्यटकीय गन्तव्यहरू बीच सेवा सञ्चालन गर्ने निजी एयरलाइन्सको भएको पुष्टि गरिएको छ।