जनकपुरधाम कार्तिक ५ । जानकी मन्दिरका उत्तराधिकारी महन्त रामरोशन दासले दीपावलीको रात मन्दिर परिसरमा निरन्तर पटाका पड्काएर धार्मिक शान्ति भङ्ग गरिएको भन्दै गहिरो दुःख व्यक्त गरेका छन्। उनले यस्तो व्यवहारले मन्दिरको पवित्रता र मिथिलाको सांस्कृतिक छविमा गम्भीर असर पुगेको बताए।

पत्रकार सम्मेलनमा महन्त दासले भने, “जानकी मन्दिर केवल इँटा र ढुङ्गाको संरचना मात्र होइन, यो जनकपुरवासीको आत्मा हो। यहाँ भक्ति, शान्ति र मर्यादा रहनुपर्छ, पटाका र बारुदको आवाजले होइन। यस्तो कार्य अत्यन्त निन्दनीय र दुःखदायी छ।” उनका अनुसार पछिल्लो समय दीपावलीका रातमा युवाहरू मन्दिर परिसरभित्र पटाका पड्काउने, नाचगान गर्ने र फोटो सेसन गर्ने प्रवृत्ति बढ्दै गएको छ। उनले बारम्बार मन्दिरभित्र यस्तो गतिविधि नगर्न आग्रह गरे पनि केहीले बेवास्ता गरिरहेको बताए। “यो हाम्रो धर्म, संस्कार र परम्पराविपरीत कार्य हो। यसले सम्पूर्ण मिथिलाको सांस्कृतिक छविमाथि दाग लागेको छ,” महन्त दासले भने।

उनले मन्दिरको मर्यादा जोगाउन सबै श्रद्धालु, स्थानीय युवाहरू र जनसमुदायलाई जिम्मेवारीपूर्वक आचरण गर्न आग्रह गरे। “जानकी मन्दिर मिथिलाको हृदय हो जहाँ भजन, आरती र शान्तिको स्वर गुन्जिनुपर्छ, पटाका र हल्लाको आवाजले होइन। मन्दिरको पवित्रता संरक्षण गर्नु सबैको कर्तव्य हो।” स्थानीय साधुसन्तहरू पनि मन्दिर परिसरमा बढ्दो आतिशबाजी र ठूला आवाजबाट त्रसित बनेका छन्। सामाजिक सञ्जालमा पनि यसप्रति आलोचना र चिन्ता व्यापक रूपमा देखिएको छ। धार्मिक स्थलमा यस्ता गतिविधिले जनकपुरधामको धार्मिक छवि र सांस्कृतिक मर्यादामा प्रश्न उठाएको भन्दै समुदायले समेत सजग हुन आग्रह गरेको छ।