काठमाडौँ कार्तिक ५ । गाजामा हमासको नियन्त्रणमा रहेका बेला नेपाली विद्यार्थी विपिन जोशीलाई गोली हानी हत्या गरिएको इजरायली राजदूत स्मूलिक एरी बासले पुष्टि गरेका छन्। जोशीको पार्थिव शरीर इजरायल हुँदै नेपाल ल्याइएपछि मंगलबार कञ्चनपुरमा उनको दाहसंस्कार गरिएको थियो।

बीबीसीसँगको कुराकानीमा राजदूत बासले फोरेन्सिक परीक्षणबाट जोशीको टाउकोमा गोली लागेको प्रमाणित भएको जानकारी दिएका छन्। उनको मृत्यु हमासको नियन्त्रणमा हुँदा भएको र यो हत्या युद्धको आक्रमणको हिस्सा नभई हमासले गोली हानी हत्या गरेको दाबी गरिएको छ। राजदूत बासले परिवारसँग भेटेर विपिनको साहसलाई सम्मान गरेका छन् र उनले विपिनको घटना इजरायल–नेपाल सम्बन्धको प्रतीकका रूपमा रहने बताए। हमासले विपिन जोशीको नाम बन्धकहरूको कुनै पनि सूचीमा समावेश नगरेको उल्लेख छ। विभिन्न युद्धविरामका समयमा पनि उनको रिहाई नभएको र नाम सार्वजनिक नभएको कारण उनको अवस्था लामो समयसम्म अज्ञात रहेको थियो।

असोज २२ गते सार्वजनिक भएको दुई वर्ष पुरानो भिडियोले नेपालीहरूमा आशा जगाएको थियो कि विपिन जीवित छन्, तर २४ गते सार्वजनिक नामावलीमा उनको नाम नरहेकोले शंका बढेको थियो। अन्ततः २७ गते इजरायली सेनाले भिडियो कन्फरेन्समार्फत जोशी जीवित नरहेको जानकारी परिवार र सम्बन्धित पक्षहरूलाई दिइएको थियो।

हालसम्म हमासले यो घटनामा कुनै प्रतिक्रिया जनाएको छैन।