रुपन्देही कार्तिक ५ । दुर्गा पूजाको मूर्ति विसर्जन गर्ने क्रममा रुपन्देहीमा बुधबार एक दर्दनाक घटना घटेको छ। गैडहवा गाउँपालिका–६ स्थित सूर्यपुराघाटमा मूर्ति विसर्जन गर्दा तीन जना युवाले ज्यान गुमाएका छन्।

मायादेवी गाउँपालिका–१ का १३ वर्षीय अजय हरिजन, १५ वर्षीय दीपु हरिजन, र २८ वर्षीय रोहित हरिजनको डुबेर मृत्यु भएको जिल्ला प्रहरी कार्यालय रुपन्देहीका प्रवक्ता डिएसपी सुरज कार्कीले जानकारी दिए। घटनास्थलमा खोजी कार्य सुरु गरेपछि करिब २०० मिटर तल उनीहरूका शव फेला पारिएको प्रहरीले जनाएको छ। तीनै जना बुधबार दिउँसो करिब ३ बजे दानव र कञ्चन नदीको संगमस्थल सन्तेश्वर घाट पुगेका थिए। सोही स्थानमा छठको तयारीसमेत भइरहेको थियो। स्थानीय सन्दीप गुप्ताका अनुसार, एकै परिवारका सदस्यजस्तै तीन युवाको मृत्यु भएपछि सूर्यपुरा र मायादेवी गाउँहरूमा शोकको वातावरण छाएको छ। केही वर्षअघि पनि तिहारको समयमा गाउँकै तीन जना युवाको डुबेर मृत्यु भएको थियो।

दशैंको उत्सव शोकमा परिणत

दुर्गा पूजाको विसर्जनसँगै उत्सवको समापन हुँदै गर्दा आएको यो घटनाले स्थानीयहरूलाई स्तब्ध बनाएको छ। जनप्रतिनिधि, सुरक्षाकर्मी र स्थानीयबासीले घटनाप्रति दुःख व्यक्त गरेका छन्।