जनकपुरधाम कार्तिक १४ । छठ पर्वको खरनासँगै मिथिलाञ्चलमा सामा–चकेवा पर्व सुरु भएको छ। दस दिनसम्म चल्ने यस सांस्कृतिक पर्वले दिदी–भाइबीचको स्नेहलाई उत्सवको माध्यमबाट झल्काउने गर्दछ।

पर्वको अवसरमा स्थानीय दिदी–बहिनीहरूले राति सामूहिक रूपमा गीत गाउँदै माटोका सामा, चकेवा, वृन्दावन, चुगला र सात भाइजस्ता पात्र निर्माण गर्छन्। चुगला पात्रमाथि हास्यपरिहास्यका गीत गाउने चलनले पर्वलाई मनोरञ्जनात्मक बनाउँछ।संस्कृतिविद्हरूका अनुसार सामा–चकेवा केवल दिदी–भाइको स्नेहको पर्व नभई वातावरणीय दृष्टिले पनि महत्वपूर्ण छ। परम्परा अनुसार, भगवान कृष्णकी छोरी श्यामा र वृन्दावनका कुमार चारुबक्य बीचको माया र उनका वरिपरि घटीएका घटनाहरूको स्मरणमा यो पर्व मनाइन्छ।

यस पर्वले मिथिलाञ्चलको सांस्कृतिक पहिचान र परम्परागत जीवनशैलीलाई जीवित राख्दै नयाँ पुस्तालाई पनि सांस्कृतिक चेतना दिन्छ।