महोत्तरी असोज १९ । शुक्रवार रातिदेखि परेको निरन्तर वर्षाले महोत्तरी जिल्लाका विभिन्न क्षेत्र जलमग्न भएका छन्। जिल्लाको सदरमुकाम जलेश्वर नगरपालिकासहित मटिहानी, औरही, बलवा, महोत्तरी गाउँपालिका, बर्दिबास, सम्सी र लोहरपटी नगरपालिका प्रभावित क्षेत्रको सूचीमा छन्।

जलेश्वर नगरपालिकामा अस्पताल, निर्वाचन कार्यालय, कारागार, महादेव मन्दिर, नगरपालिकाको कार्यालय र साहुजी पटीलगायतका बस्तीहरूमा पानी पसेर जनजीवन प्रभावित बनेको छ। मटिहानी नगरपालिकाको वडा नं १, ६, ८ र ९ का क्षेत्र पूर्ण रूपमा डुबानमा छन् भने सिमरदही टोलमा बस्ती नै पानीमुनि परेको छ।

बलवा नगरपालिकामा तीन फिटसम्म पानी जमेको छ भने पिपरा गाउँपालिकामा पानी पसेपछि जनकपुरधाम–जलेश्वर सडक खण्ड पूर्ण रूपमा अवरुद्ध भएको छ। जिल्लाका मुख्य नदीहरू विगही, औरही, कुटमेश्वरी र रातुको पानीको स्तर तीव्र रूपमा बढेपछि आसपासका बस्तीहरू डुबानमा परेका छन्। प्रमुख जिल्ला अधिकारी नारायण प्रसाद रिसालका अनुसार उद्धार र रेस्क्यु टोलीहरू जिल्ला भर परिचालित गरिएको छ। हालसम्म मानवीय क्षतिको सूचना नआएको बताउँदै उनले थप क्षति हुन नदिन आफू स्वयं स्थलगत निरीक्षणमा रहेको जानकारी दिए।