पर्सा असोज ४ । वीरगञ्ज महानगरपालिकाले चालु आर्थिक वर्ष २०८२ र ८३ का लागि विनियोजन गरिएको बजेटमा संशोधन गरी पुनर्निर्माण कार्यमा प्राथमिकता दिने निर्णय गरेको छ। शनिबार सम्पन्न विशेष नगरसभाले यस सम्बन्धी प्रस्ताव सर्वसम्मत रूपमा पारित गरेको हो। गत भदौ २४ गते सचेत युवाहरूको जेनजी आन्दोलनका क्रममा महानगरको कार्यालय भवन लगायत सम्पूर्ण संरचनामा आगजनी, तोडफोड र लुटपाट भई गम्भीर क्षति पुगेको थियो। कार्यालयको सम्पत्ति जलेर खरानी भएपछि सेवा प्रवाह प्रभावित बनेको थियो।

पुनर्निर्माणका लागि बजेटको दिशा फेर्ने निर्णय

विशेष नगरसभामा महानगर प्रमुख राजेशमान सिंहले संशोधित बजेट पेश गरेका थिए। त्यसअनुसार, १७औं नगर परिषदले अघि सारेको ३ अर्ब २२ करोड ४८ लाख ४९ हजार रुपैयाँको बजेटभित्रका पूँजीगत योजना, सामाजिक विकास कार्यक्रम तथा वडास्तरका योजनाहरूमा विनियोजन गरिएको रकमबाट करिब ३० करोड रुपैयाँ पुनर्निर्माणका लागि छुट्याउने निर्णय गरिएको हो।

यी क्षेत्रमा खर्च हुनेछ बजेट

संशोधित बजेटबाट निम्न क्षेत्रहरूमा खर्च गरिनेछ;

प्रशासनिक भवन निर्माण

सवारीसाधन खरिद

मेसिनरी उपकरण, कम्प्युटर, ल्यापटप, प्रिन्टर र फर्निचर खरिद

कार्यालय मर्मत

गाडी भाडा तथा बिजुलीबत्तीको खर्च

अन्य आवश्यक सामग्रीको व्यवस्थापन

ज्यान गुमाएका युवाको परिवारलाई राहत

त्यसैगरी, विशेष अधिवेशनले जेनजी आन्दोलनका क्रममा काठमाडौंमा प्रहरीको गोलीबाट ज्यान गुमाएका वडा नं। १२ का युवा असहाब आलमको परिवारलाई ५ लाख रुपैयाँ राहत रकम उपलब्ध गराउने निर्णय पनि सर्वसम्मत रूपमा पारित गरेको छ।

पुनर्निर्माण र संस्थागत सुदृढीकरणमा जोड

नगरसभाका अनुसार, संशोधित बजेटमार्फत नगरको भौतिक पूर्वाधार पुनःस्थापना, प्रशासनिक कार्यक्षमता अभिवृद्धि, र सेवा प्रवाहलाई पुनःसञ्चालन गर्ने कार्य तत्काल अगाडि बढाइनेछ।