रौतहट ।

 जिल्लाका १० वटा पालिकाले आगामी आर्थिक वर्ष २०८२÷८३ का लागि बजेट सार्वजनिक गरेका छन् । जिल्लाका १८ स्थानीय तहमध्ये चन्द्रपुर, गौर, राजदेवी, इशनाथ, गढीमाई, माधवनारायण, बौधीमाई, राजपुर, कटहरिया र गरुडा नगरपालिकाले नगरसभा सम्पन्न गरेका हुन् ।

जिल्लाको चन्द्रपुर नगरपालिकाले आगामी आवका लागि  एक अर्ब २१ करोड रुपैयाँ  भन्दा बढी बजेट प्रस्ताव गरेको छ । सोमबार चन्द्रनिगाहपुर बसेको नगरसभाको १५औँ अधिवेशनमा आगामी आवका लागि एक अर्ब २१ करोड ५९ लाख ५१ हजार छ सय ४० बजेट रुपैयाँ प्रस्ताव गरेको हो ।

अधिवेशनमा नगर उपप्रमुख जयमाला चौधरीले नीति तथा कार्यक्रम र बजेट वक्तव्यमा नगरले विगत वर्षका अधुरा आयोजना सम्पन्न गर्नेमा जोड दिए । करिब  छ करोड रुपैयाँ मा निर्माण भइरहेको शीतभण्डार आगामी वर्षभित्र सम्पन्न गर्नेगरी योजना ल्याइएको उनले जानकारी दिए । नगरलाई पूर्ण बालश्रममुक्त अभियान र बालविवाहमुक्त वडा घोषणा कार्यक्रमलाई प्रोत्साहन गरिने छ ।

नगरसभा बैठकमा मधेस प्रदेशका सांसद युवराज भट्टराईले विकासका काममा सबै जनप्रतिनिधि एकजुट भएर समन्वय र सहकार्य गर्नुपर्नेमा जोड दिए । नगर क्षेत्रको विकासका लागि आवश्यक सहयोग र समन्वय गर्न आफू तयार रहेको बताए ।

नगरप्रमुख सञ्जयकुमार काफ्लेले आगामी आवमा जनताका माग सम्बोधन हुनेगरी बजेट विनियोजन गरिने प्रतिबद्धता जनाए । विकास, निर्माण, शिक्षा, स्वास्थ्यलगायत क्षेत्रलाई समेटेर बजेट विनियोजन गरिने उनको भनाइ छ ।

नगरपालिकाले चालु आवमा  एक अर्ब ४७ करोड ३६ लाख १८ हजार ८२३ रुपैयाँ विनियोजन गरेको थियो । उक्त बजेटको तुलनामा आगामी आवमा  २५ करोड ७७ लाख रुपैयाँ कम विनियोजित भएको छ ।

जिल्लाका १८ स्थानीय तहमध्ये हालसम्म १० वटाले नगरसभा सम्पन्न गरेका छन् भने वृन्दावन, गुजरा, मौलापुर, देवाही गोनाही, फतुवा विजयपुर र परोहा नगरपालिका तथा दुर्गा भगवती र यमुनामाई गाउँपालिकाले अझै बजेट ल्याउन सकेका छैनन् ।

गत शनिबार गढीमाई नगरपालिकाले  ५४ करोड ९१ लाख ७२ हजार १०८ रुपैयाँ को बजेट प्रस्तुत गरेको छ । आर्थिक वर्ष २०८२÷८३ को नीति तथा कार्यक्रम र बजेट प्रस्तुत गर्दै नगरप्रमुख श्यामप्रसाद यादवले कूल बजेटमध्ये पुँजीगततर्फ  १९ करोड १५ लाख ४९ हजार रुपैयाँ र चालूतर्फ  ३५ करोड ७६ लाख २३ हजार १०८ रुपैयाँ विनियोजन गरिएको जानकारी दिए ।

शनिबार इशनाथ नगरपालिकाले ११औँ नगरसभाको खुलासत्र सम्पन्न गरेको थियो । आव २०८२÷८३ का लागि नगर उपप्रमुख प्रवेज आलमले  ४९ करोड ६५ लाख ५२ हजार ४९७ रुपैयाँ को बजेट प्रस्तुत गरेका हुन ।

राजपुर नगरपालिकाले  ५७ करोड रुपैयाँ बजेट खर्च हुने अनुमानित बजेट नगरसभामा प्रस्तुत गरेको थियो । नगरप्रमुख डा मोहम्मद राजिक आलमले सामाजिक विकास, पूर्वाधार विस्तार, शिक्षा, स्वास्थ्य र रोजगारीलाई प्राथमिकतामा राख्ने नीति तथा कार्यक्रममा प्रस्तुत गरे ।

कटहरिया नगरपालिकाले आव २०८२÷८३ का लागि  ५४ करोड २५ लाख ५२ हजार ४७५ रुपैयाँ को अनुमानित बजेट प्रस्तुत गरेको छ । नगरसभामा नगरप्रमुख अजयप्रकाश जैयसवालले नीति तथा कार्यक्रम सार्वजनिक गर्दै नगरभित्रका नागरिकको विभिन्न सङ्क्रमण तथा सबै प्रकारका रोग र विपद्बाट जीवनरक्षा गर्दै सहज र सुरक्षित जीवनयापन गर्ने वातावरण बनाइने बताए ।