काठमाडौँ,
पाँच दशकदेखि शान्ति र आत्म चेतनाको ज्ञान प्रवाह गर्दै आएका प्रख्यात वक्ता प्रेम रावतले नेपाली समाजमा पनि आत्मज्ञान र शान्तिको सन्देश प्रवाहका लागि प्रवचन दिने छन ।
आत्मज्ञान प्रसार सङ्घ नेपालद्वारा शनिबार बिहान रुपन्देहीको सैनामैनामा नगरपालिका–७ गौतमबुद्ध अन्तरराष्ट्रिय क्रिकेट रङ्गशालामा आयोजित एक कार्यक्रममा उनको करिब दुई घण्टा शान्तिका लागि प्रवचन हुने संस्थाका सञ्चार संयोजक श्रीराम अधिकारीले जानकारी दिए ।
भारतीय मूलका विश्वविख्यात शान्तिका प्रेरक रावतले एक दशकअघि भक्तपुर र पोखरामा विश्व शान्तिको कामना गर्दै प्रवचन दिनेभएका हुन । विमान चालकसमेत रहेका रावतका विश्व शान्तिसम्बन्धी प्रवचन एक सय १० भन्दा बढी देशमा प्रत्यक्ष प्रसारण हुँदै आएको आयोजकको दाबी छ ।
प्रवचनका क्रममा उनले भने “हामीले कल्पना गरेको स्वर्ग र नरक यहीँ छन् । मानिस क्रोध र अहङकारका बेला नरकमा हुन्छ, ह्दयमा प्रेम र कृतज्ञता भरिँदा यहीँ स्वर्गको अनुभव गर्न सक्छ । त्यसैले मानिसले आफ्नो जीवनमा स्वर्गको अनुभव यहीँ गर्न सक्छ ।”
उनका नाममा स्थापित द प्रेम रावत फाउन्डेसनले शान्ति शिक्षासम्बन्धी कार्यक्रम विश्वका ८७ बढी देशमा ४६ भाषामा सञ्चालन गरिरहेको आयोजक संस्थाले जानकारी दिएको छ ।