सीके राउत नेतृत्वको जनमत पार्टीमा आर्थिक विषयलाई लिएर विवाद चर्किएको छ । आर्थिक हिसाबकिताबबारे अध्यक्ष राउत र कोषाध्यक्ष सुरेन्द्रनारायण यादवबीच आरोपप्रत्यारोप भएको हो । हिसाबकिताबको विवादले अध्यक्ष राउतले कोषाध्यक्ष यादवलाई कारबाही गरेका छन् ।

२५ फागुनमा सुरु हुन लागेको केन्द्रीय समिति बैठकको ठीक अघिल्लो दिन कोषाध्यक्षलाई राउतले कारबाही गरेका हुन् । यादवलाई ११ फागुनमा स्पष्टीकरण सोधिएको थियो । आर्थिक पारदर्शिता नभएको भन्दै विभिन्न चारवटा आरोप लगाई स्पष्टीकरण सोधिएको थियो । स्पष्टकीरणको जवाफ नदिँदै कोषाध्यक्ष यादव कारबाहीमा परेका हुन् ।

कोषाध्यक्ष यादवमाथि चन्दा उठाएर व्यक्तिगत लाभ लिएको आरोप लागेको छ । उनले विभिन्न कार्यकर्ताबाट उठाएको लेबीबाट काठमाडौंमा घर किन्नेदेखि जनकपुरमा व्यवसाय गरेकोसम्म आरोप लागेको छ । करोडौँ रकम हिनामिना गरेको आरोपमा राउतले कारबाही गरेपछि यादवले पनि अध्यक्ष राउतले आर्थिक हिनामिना गरेको बताउने गरेका छन् ।

आफूले पार्टीमा करिब ५ करोडसम्म लगानी गरेको र त्यसको हिसाब मागेपछि कारबाही गरिएको दाबी उनले गरेका छन् । आफूले पार्टीभित्र हिसाबकिताब माग्न थालेपछि केन्द्रीय समितिको बैठकअघि कारबाही गरिएको दाबी गरेका छन् । यादवले स्पष्टीकरणको जवाफ दिन नपाउँदै कारबाही गर्नुले राउतको कमजोरी रहेको यादवले दाबी गर्ने गरेका छन् ।

यादवमाथि गुटबन्दी गरेको, पार्टी विभाजन गराउने खेलमा लागेको आरोप पनि लागेको छ । पार्टीको अनुशासन समितिले कोषाध्यक्ष यादवलाई सोधेको स्पष्टीकरणमा पार्टी विभाजनका लागि चलखेल गरेको बारे उल्लेख गरिएको छ । साथै, समितिले  अनुशासन समितिका संयोजक दीपक साहलाई पनि कारबाही गरेको छ ।