काठमाडौं- उपेन्द्र यादव नेतृत्वको जनता समाजवादी पार्टी (जसपा) नेपालले वर्तमान सरकारलाई दिएको समर्थन कायमै राख्ने निर्णय गरेको छ । तीन दिनसम्म ललितपुरमा बसेको केन्द्रीय समिति बैठकले केपी शर्मा ओली नेतृत्वको सरकारलाई दिएको समर्थन कायमै राख्ने निर्णय गरेको हो ।
बैठकपछि जसपा नेपालका प्रवक्ता मनिष सुमनले सरकारर्लाइ दिएको समर्थन फिर्ता लिनेबारेमा कुनै निर्णय नभएको बताए। अहिले पनि सरकारलाई समर्थन कायमै रहेको जानकारी उनले दिए ।यद्यपि उक्त बैठकले भ्रष्टाचारको अन्त्य, सुशासन कायम, विकास र संविधान संशोधनका लागि वर्तमान सरकार असक्षम रहेको निष्कर्ष निकालेको उनले बताए ।
सरकारले गत पुस र माघमा जारी गरेका ६ अध्यादेशको प्रक्रियाप्रति बैठकले असहमति जनाएको छ । यही बैठकले भूमिसम्बन्धी अध्यादेश फिर्ता लिन सरकारसगँ माग गर्ने निर्णय गरेको पनि उनले बताए ।
अन्य पाँचवटा अध्यादेशलाई भने समर्थन जनाउने निर्णय गरिएको उनले बताएका छन् । त्यस्तै बैठकले ताप्लेजुङको पाथिभरामा ‘नो केवलकार अभियान’प्रति समर्थन जनाएको छ ।
यस प्रकरणमा वार्ता र सम्वादमार्फत् समस्याको समधान गर्न सरकारको ध्यानाकर्षण गराइएको प्रवक्ता सुमनले जानकारी दिए।
बैठकले सबै स्थानीय तह र भातृ संस्थाको अधिवेशन वैशाख मसान्तभित्र सम्पन्न गर्ने निर्णय गरिएको उनले बताए ।
सबै अधिवेशन सम्पन्न भइसकेपछि हुलाकी राजमार्ग, मध्यपहाडी लोकमार्ग र हिमाली राजमार्गमा सय दिने जनतासँग भेटघाट अभियान चलाउने निर्णय बैठकले गरेको छ ।
प्रतिक्रिया
